ខេត្តកំពង់ចាម ៖ នាពេលកន្លងមកនេះគឺមានយុវសិស្សមួយចំនួនបានធ្វើឲ្យមានការប្រាសចាកនៅថ្ងៃនៃក្តីស្រលាញ់ ដែលបានធ្វើឲ្យបាត់បង់នូវសេចក្តីសេចក្តីថ្នូរ និងកិត្តិយសគ្រួសារ ។ ស្ថាប័នមន្ទីរអរប់រំខេត្តបានចេញសារខ្លីជាការដាស់តឿនដល់នាយក-នាយិការនៅតាមវិទ្យាល័យនានាត្រូវតែយកចិត្តទុកដាក់ក្នុងការទប់ស្កាត់ និងផ្សពផ្សាយឲ្យបានទូលំទូលាយដល់សិស្សានុសិស្សទាំងអស់ ត្រូវតែបង្កើននូវការប្រុងប្រយ័ត្នខ្ពស់កុំឲ្យចាញ់បោកអ្នកណាម្នាក់ដែលនាំឲ្យអាប់អោនកិត្តិយសគ្រួសារ ។
យុវសិស្សម្នាក់ឈ្មោះ ឡាយ រិទ្ធី ភេទប្រុស អាយុ១៦ឆ្នាំ រៀនថ្នាក់ទី១១នៅវិទ្យាល័យហ៊ុន សែនកំពង់ចាម ប្រាប់ឲ្យដឹងនៅល្ងាចថ្ងៃទី១១ កុម្ភៈ ថាក្នុងនាមរូបគេជាសិស្សម្នាក់គឺតែងតែបានស្តាប់នូវការទូន្មានរបស់លោកនាយកវិទ្យាល័យរបស់ខ្លួនជាញឹកញាប់ ដោយបានដាស់តឿននូវថ្ងៃនៃក្តីស្រលាញ់ដែលនៅទូទាំងពិភពលោកគ្រោងនឹងធ្វើឡើងនៅថ្ងៃទី១៤ កុម្ភៈ រាល់ឆ្នាំនោះមិនមែនជាបុណ្យសង្សារអ្វីនោះទេ សូមកុំឲ្យមានការយល់ច្រឡំ ។
យុវសិស្សខាងលើបានប្រាប់បន្តថា នៅថ្ងៃនោះគឺគ្រាន់តែចង់ប្រាប់ថា« សូមឲ្យចេះប្រើនូវក្តីស្រលាញ់រវាងកូន និងឪពុកម្តាយ ក្តីស្រលាញ់ចំពោះមិត្តភក្តិ ក្តីស្រលាញ់ចំពោះលោកគ្រូ អ្នកគ្រូ ព្រោះគាត់ជាអ្នកដែលបានផ្តល់នូវចំណេះដឹងដល់សិស្សគ្រប់រូប ។ រូបគេនឹងបង្ហាញពីកាយវិការធ្វើយ៉ាងណាដើម្បីឲ្យដឹងថារូបគេមានទឹកចិត្តស្រលាញ់ដល់ឪពុកម្តាយ ដែលជាអ្នកផ្តល់កំណើតរូបគេតាំងពីនៅទារកខិតខំបីបាច់ថែរក្សាជាច្រើនខែឆ្នាំ ទំរាំនឹងបានចូលរៀននៅថ្នាក់បឋមសិក្សារហូតដល់វិទ្យាល័យ ។ ជាកិច្ចតបស្នងគុណម្តាយឪពុក និងលោកគ្រូអ្នកគ្រូគឺមិនបានបានធ្វើអ្វីមួយឲ្យខុសនោះទេ នៅថ្ងៃបុណ្យនៃក្តីស្រលាញ់នោះគោរពត្រងត្រាប់ស្តាប់ការណែនាំរបស់គ្រូឲ្យស្របតាមសុភាសិតខ្មែរលើកឡើងថា «ដាំក្នុងសាលាផ្លែក្នុងសង្គម » ។
លោកលី ម៉េងសាន ប្រធានមន្ទីរអប់រំយុវជន និងកីឡាខេត្តមានប្រសាសន៏ឲ្យដឹងដែរថា រូបលោកសូមអំពាវនាវដល់លោកនាយក-នាយិការ នៅតាមគ្រឹះស្ថានសិក្សាទាំងអស់ក្នុងខេត្តកំពង់ចាមសូមប្រឹងប្រែងជួយផ្សព្វផ្សាយនៅពេលម៉ោងគោរពទង់ជាតិ ដើម្បីឲ្យសិស្សានុសិស្សគ្រប់ៗរូបមានការយល់ដឹងកាន់តែច្បាស់ថ្ងៃបុណ្យនៃក្តីស្រលាញ់ ដែលនឹងប្រព្រិត្តិទៅថ្ងៃទី១៤ កុម្ភៈ ២០១៧ ខាងមុខនេះ ៕
ប្រភពដើម៖ យ៉ាន់ ចាន់ថេត កោះសន្តិភាព
Posts
